بعد شويه الولاد صحيوا وبيصرخوا
قمت براحه وروحت ائكلهم
لكن بيصرخوا جامد مش عارفه اسكتهم
كريم الحقني الولاد مش عارفه ملهم
قام يا حبيبي مفزوع واخد مني تاليا
بيحاول يسكتها الا ان بدأ وشها لونه يتغير و شفيفها بتزرق
وكأنها بتتخنق
جرينا بيهم علي اقرب مستشفي
تشخيص الدكتور ان في ميه عالرئه متشفطتش كويس
اما تاليا كان عندها مشكله في التنفس وضربات القلب سريعه جدا
دخلوا الحضانه الاتنين وتاليا في حاله حرجه
انهالت من البكاء وانا بقول يارب انت فرحتني بعد سنتين من الوجع
وكرمتني ومنيت عليا
يارب بركلي فيهم يارب ما توجع قلبي عليهم
يارب خد من عمري ومد عمرهم
ولقيتني بقول لكريم تفتكر دا باقي تفسير الحلم لااااااااا
ليه يا امي انتي اكتر وحده حسه بوجعي
و عدى علينا يوم الثلاثاء والاربعاء
واحنا مسبناش المكان ما بين الحضانه
و مسجد المستشفي
ويوم الخميس قبل صلاة العشا
الممرضه خرجت ندهت عليا
وقالتلي الدكتور سمح لحضرتك تدخلي تشوفي تاليا
استغربت اشمعنا تاليا
دخلت انا وكريم والدكتور كان جوا
لقيت بنتي لونها مزرق وشفيها مزرقه
وجسمها متلج قلبي وجعني
الدكتور قال انا سبتك تدخلي تشوفيها لان حالتها بتتأخر ومفيش استجابه لعلاج وكمان مش قبله الرضعه
وكأنها زهده الدنيا ربنا يباركلكم في اخوها
صرخت وكريم يا قلبي نزل علي ركبته و بيبكي بصوت عالي
وانا فضلت اصرخ تاليا حبيبتي
اوعي تسبيني انا استنيتك كتير
والنبي يارب انت قادر علي كل شئ
والنبي يارب تباركلي فيها وف اخوها
والنبي يارب انا اتوجعت كتير وانت منيت عليا بفرحتي بيهم بلاش تحرمني منهم
كريم اخدها فحضنه وبسها و قرأ في اُذنها اية الكرسي و الاخلاص والمعوذتين
وسبني ونزل يصلي العشا و يدعلها
وانا اخدتها وفضلت ادعي ادعي
وهي شبه ميته نفس ضعيف و جسمها تلج
وفجأة حصلت معجزه
ولقيت تاليا بتصرخ جامد
و وشها نور تاني وشفيفها احمرت
هي تصرخ وانا اصرخ من الفرحه الدكتور اخدها مني
وحطها تاني عالاجهزه و هو في حالة ذهول
وهو يردد سبحانك ربي ما اعظمك
وبعد دقيقتين جت الممرضه تجري عليا وتقولي...........
وغدا نلتقي في حلقة جديدة
تحياتي نانا محمد
ليست هناك تعليقات:
إرسال تعليق