لسه فاكر ايوا لسه كان من سنه يوم ما تعبتي
واول ما شوفتك حاجة كدا خطفت قلبي قالتلي ان شكلها خلاص
بس فضلت معافر وقولت لا عمرها ما هتكون خلاص !
لسه فاكر يوم ما كنت صايم وجيت وشلتك اوديكي للدكتور منتي كنتي بتدلعي
وانا معرفش استحملت دا كله ازاي وانا هموت من الجوع والعطش
بردو فاكر لما اكلتك بايدي وقولتلك متكسفيش ايدي عشان خاطري ؛)
واخر حاجة قولتهالي ابقي تعالي شوفني
وساعتها لما مشيت وانا حابس دمعتي انها تنزل لاني اتاكدت انها خلاص
بردو منساش يوم ما طلعت وشوفتك نايمة بسالمرادي مش زي كل مرة
وانا بحاول زي المجنون اسمع نبض احس بنفس بس للاسف كانت خلاص
والي عمره ما هنساه اخر لحظة وداع
يوم ما كنت واقف مستنيكي تنزلي قبرك وفجاة الاقي نفسي انا الي شايلك وداخل بيكي
ااااه يا قلبي جبت قسوتك دي منين
وازاي قدرت تشوف وشها وهو بيضحك لما تفك كفنها وانت بتودعها
معقول متعلق بيها لحد قبرها طب ازاي وصلتها !
وعمري ما هنسي يوم ما سمعت اخر حجر اتقفل عليكي
ساعة ما البحر كان اقل من دموعي وقتها
حسيت اني خلاص ضيعتك من بين ضلوعي
لكن الي عمري ما هنساه هو انتي ..ضحكتك كلمتك حنيتك
علي فكره حضنك وحشني وفي عز الليل ببقي مشتاق احضنك بس مش بأيدى
سامحيني المرادي مش هعرف اجيلك بس انا حاسس بيكي ومش ناسيكي
