قرر هاني انه يقعد اسبوع واحد في مصر لان لو قعد اكتر من كدا هيصرف كتير
وعدي يومين و امل بعد صدمتها في الهدية واللي شافته معاه قررت تتكلم معاه وتاخد موقف
امل : هاني انا مش هقعد تاني هنا لوحدي ولازم تخدني معاك و لو علي المصاريف بتعتي انا هدور علي شغل و هصرف علي نفسي
هاني : والله فكرة موضوع الشغل دا اهو نكمل الارشين و بعدين ننزل نعمل اي مشروع و نعيش هنا بس جهزي ورقك و اول ما القيلك شغل هقولك تبعتي الورق علي الفكس بتاع الشركة اللي هتشتغلي فيها و الشركة هتبعتلك الفيزا و التذكره وبكدا منتكلفش
امل : لا اله الا الله يارب ارحمني
هاني : ايه انا قولت حاجه غلط
امل : لا ابدا انا اللي غلطانه
هاني : طيب بالمناسبة السعيدة دي احب اقولك اني مسافر اخر الاسبوع وعشان كدا عزمك علي العشا برا
امل : عشا برا مرة وحدة مش ممكن
هاني : عشان بس متقوليش عليا بخيل
امل : انت دانت نسمه
هاني : طيب ياله البسي
امل : لبست و اتشيكت و خرجوا و هي فرحانه و فضلوا يتمشوا في وسط البلد لما رجليها فقفقت
و وقف هاني ادام جاد بتاع الفول و الفلافل
امل : ايه هنتعشا هنا
هاني : اه
امل : طيب هاتلي 3 شاورمه
هاني : شاورمة ايه دانا هاكلك فول تحفه الواحد مبيكلوش بره
امل : انت مبتكلوش انا مبقتعوش يابو 400 جنيه
ال فول ياميلت بختك يا ميار 😱
وجاب هاني سندوتشين فول وزيهم طعميه و كلوا علي الرصيف
وهما مروحين هاني قال لها نخدها مشى بئا عشان نهدم و منتعبش
امل : نهدم هو احنا كلنا المفسخ
هاني : الرياضه حلوه
و روحت امل و هي رجليها ورمه من المشي 🚶 🚶 وقالت لهاني يارتني ماكنت خرجت
اهو انا عرفت قيمة المثل اللي بيقول من خرج من داره اتقل مقداره
وبعد كام يوم سافر هاني و تعبت امل بعدها جدا ولكن كان تعبها خير 👶
و غدا حلقة جديدة من مسلسل حياة بنت مصرية
تحياتي. نانا محمد
ليست هناك تعليقات:
إرسال تعليق