الأربعاء، 18 مايو 2016

كان زي النهارده

كان زي النهارده من 25 سنه
كان زي النهارده ادور عليكي ملاقيكش هنا
كان زي النهارده اصعب يوم علينا يا نور عنينا

وقتها ماكنتش اعرف يعني ايه طعم الفراق
ولا دموع العيون اللي هيقتلها الاشتياق

كان يوم صعب علي سننا
يومها عرفنا الهم اللي هنعيش بيه طول عمرنا
يوم ما اتقتل قلوبنا
وعرفنا مسير شبابنا

يوم ما أنقطع  الخير
وعرفنا حقيقة الغير

كان زي النهارده من ٢٥ سنه
يوم وفاتك يا امي محفور فى قلبنا

صعب ننساه
و ننساه ازاي ودا اصعب يوم عيشناه فى عمرنا

لكي يا أمي . نانا  محمد

السبت، 16 أبريل 2016

غــنوة وحدتــى



غني يا وحدتى من لحن أيامي 
و آعزفي حزن السنين على أوتار أنغام كلامي
دا صمتى اصبح عاده مجبور عليه لسانى
يمكن كتر الهموم سبب فــ كتماني
   و جايز عيونى جفت دموعها من شدة الأااه       فـــ وجداني

مابقتش أخاف مـــ الوجع من عشرتى ليه
لكن أخاف الفرح من مكر عنيه
بيحسدونى عــ الكلام اللى يعبر قلمي بيه
ويقولوا فنانه يا بخت بوحها فيه

ما يعرفوش إن عجز اللسان عن كلامى
و أصبح القلم هو لحن أيامي

و دا كرم ربي عليا إني آفضفض بيه
يا عالم كان هيصبح حالي أيه
لكن أكيد ربي كتبلي الخير فيه
و هيفضل هو لسانى اللى أعبر بيه

أوقات تداعبنى عطر زكريات أجندتى
أمر بين سطورها و أنا فـــ أشد فرحتى

أفتكر كل حرف كتبته في وقتها
ولقى نفسي أدمع من حزن الكلام و فــ نفس اللحظه تبتسم عيونى علي فرحه عشتها
أكتبلى يارب الراحه فـــــ وحدتي اللي عشقتها



~ بقلـــــ نانا محمد ـــــم ~